உளுந்தூர்பேட்டையில் அரசு கலை மற்றும் அறிவியல் கல்லூரி சார்பில் சமத்துவ பொங்கல் விழா கோலாகலம்.

உளுந்தூர்பேட்டை | ஜனவரி 13

கள்ளக்குறிச்சி மாவட்டம் உளுந்தூர்பேட்டையில், தமிழர்கள் திருநாளான பொங்கலை முன்னிட்டு அரசு கலை மற்றும் அறிவியல் கல்லூரியில் சமத்துவ பொங்கல் விழா இன்று கல்லூரி வளாகத்தில் கோலாகலமாக நடைபெற்றது. சமத்துவம், ஒற்றுமை மற்றும் சமூக நல்லிணக்கம் ஆகிய அடிப்படைகளை வலியுறுத்தும் வகையில் இந்த விழா ஏற்பாடு செய்யப்பட்டது.

இந்த நிகழ்ச்சிக்கு கல்லூரி முதல்வர் முனைவர் கு.செல்வராஜ் தலைமை வகித்தார். மாணவர்களிடையே தமிழர் பாரம்பரியம், விவசாயத்தின் முக்கியத்துவம் மற்றும் சமூக ஒற்றுமை குறித்த விழிப்புணர்வை ஏற்படுத்தும் நோக்கில் சமத்துவ பொங்கல் விழா நடத்தப்பட்டது.

விழாவில் உளுந்தூர்பேட்டை சட்டமன்ற உறுப்பினர் ஏ.ஜே. மணிகண்ணன் சிறப்பு அழைப்பாளராக கலந்து கொண்டு சமத்துவ பொங்கலை தொடங்கி வைத்து சிறப்புரையாற்றினார். அவர் பேசுகையில், “தமிழர் திருநாளான பொங்கல் விவசாயத்தின் மகத்துவத்தையும், உழைப்பின் உயர்வையும் எடுத்துரைக்கும் திருநாள். சமத்துவ பொங்கல் மூலம் அனைத்து தரப்பினரும் ஒன்றிணைந்து கொண்டாடுவது சமூக ஒற்றுமைக்கு வலு சேர்க்கும்” என்று தெரிவித்தார்.

மேலும், விழாவில் தமிழ்நாடு கலை மற்றும் அறிவியல் கல்விக் கழக ஆட்சிமன்ற குழு உறுப்பினர் உள்ளிட்டோர் கலந்து கொண்டு மாணவர்களை உற்சாகப்படுத்தினர். மு.சம்பத்குமார், ஜ.வின்செண்ட் தன்ராயகம், இரா.மணிவண்ணன், த.தமிழ்வேல், பொங்கல் விழா ஒருங்கிணைப்பாளர் கு.குருராஜ் ஆகியோர் சிறப்பு விருந்தினர்களாக கலந்து கொண்டு உரையாற்றினர்.

விழாவின் ஒரு பகுதியாக பொங்கல் பானை வைத்து பொங்கல் வழிபாடு, தமிழர் பாரம்பரிய அலங்காரங்கள், மாணவ மாணவியர்களின் கலாச்சார நிகழ்ச்சிகள் மற்றும் தமிழர் பண்பாட்டை விளக்கும் உரைகள் இடம்பெற்றன.

இந்த நிகழ்ச்சியில் கல்லூரி பேராசிரியர்கள், அலுவலக பணியாளர்கள் மற்றும் மாணவ மாணவியர்கள் திரளாக கலந்து கொண்டு சமத்துவ பொங்கல் விழாவை உற்சாகமாகக் கொண்டாடினர். இவ்விழா, மாணவர்களிடையே தமிழர் பண்பாடு, சமத்துவ சிந்தனை மற்றும் சமூக பொறுப்புணர்வை வளர்க்கும் வகையில் அமைந்ததாக பங்கேற்றோர் பாராட்டினர்.